Today no just be one ordinary day
Even you sef feel am the same way
As for those wey no understand wetin I talk
I dey talk about a great man wey come this world on this day
Because dem born am some years ago dis same day
Then indeed this day na special day.
Na true talk say e dey hard well well
To find a good man, wey handsome, wey nice
Wey get sense, wey get purpose, wey be blessing to everyone around am
And on top everything, come sabi Baba God join
But if you know Moses R. Eromose
Then you don find the complete package be dat o
Make you try no loose am.
This young man get ororo for head
In fact, he no come dis world come look people face
He come dis world come make impact
He love God so tey he don completely yield im entire being to Baba God will
If you know Moses, and you never even hear the gospel from am
In one way or the other, then no be the Moses wey I sabi you sabi.
Aside im fire for God
This bobo love for im fellow man dey overflow
Nothing dey sweet dis bobo pass to dey create smiles for people face
Im sense of humor no be wetin you fit buy for market
He fit sacrifice im time, money and any other resources
Just to see say those around am dey ok gidigba.
Sometimes I dey wish say I don know this bobo many years before now
Because im na one of those people
Wey person dey wish say dem don meet earlier for life
I fit talk on and on and on and word no go finish for my mouth
To talk about this bobo.
My wishes for you my friend
on this special day and always be say;
all the days of your life na only joy wey dey sweet belle you go know
testimonies upon testimonies no go commot for your mouth
God go take you deeper and deeper for your waka with am
you go live a fulfilled life
prosperity go be your second name
because of you people go use two legs waka come meet God
because dem want the God of Moses R. Eromose
to still be there God
your days on earth go complete
and indeed years after you meet God for heaven
your mark go still dey on the face of the earth.
Padi mi… shine on brighter than the stars
Grow more beautiful than the diamonds
Live, love and laugh…
I love you now and always.
Happy birthday to a friend turned brother
Keep the fire burning… redder and hotter
Happy birthday Moses R. Eromose
Written by: Kikelnice